![](https://keralacorrespondent.com/wp-content/uploads/2022/10/04.jpg)
വടക്കഞ്ചേരി ബസ് അപകടത്തില് പ്രതികരണവുമായി ഗതാഗതമന്ത്രി ആന്റണി രാജു. ഡ്രൈവര്മാരുടെ ഡ്രൈവിങ് പശ്ചാത്തലം, എക്സ്പീരിയന്സ് തുടങ്ങിയവ വളരെ പ്രാധാന്യത്തോടെ കാണണമെന്ന് മന്ത്രി പ്രതികരിച്ചു. വിനോദയാത്ര പോകുന്ന ബസിന്റെ വിവരങ്ങള് ആര്.ടി.ഒ ഓഫീസില് കൈമാറാന് ശ്രദ്ധിക്കണം. വടക്കഞ്ചേരി അപകടത്തില് ആദ്യഘട്ട രക്ഷാപ്രവര്ത്തനത്തില് താമസം നേരിട്ടെന്നും മന്ത്രി കൂട്ടിച്ചേര്ത്തു. കാറിനെ ഓവര്ടേക് ചെയ്ത ടൂറിസ്റ്റ് ബസ്, മുന്പില് പോയിരുന്ന കെ.എസ്.ആര്.ടി.സി ബസിന്റെ പുറകില് ഇടിക്കുകയായിരുന്നു. ഇടിയുടെ ആഘാതത്തില് രണ്ട് ബസുകളും വശങ്ങളിലേക്ക് ചെരിഞ്ഞ് മറിഞ്ഞു. അപകടമുണ്ടായതിന് പിന്നാലെ വന്ന വാഹനങ്ങള് ആദ്യം ഇവരെ രക്ഷിക്കാനോ അടിയന്തര വിവരങ്ങള് കൈമാറാനോ ശ്രമിച്ചില്ല. അപകട വിവരം അറിഞ്ഞപ്പോള് തന്നെ, ട്രാന്സ്പോര്ട്ട് കമ്മിഷണറുമായി ബന്ധപ്പെട്ടു. അദ്ദേഹം ഉടനെ തിരുവനന്തപുരത്ത് നിന്ന് പാലക്കാട്ടേക്ക് തിരിച്ചു. പല സ്കൂളുകളും വിനോദയാത്ര പോകുമ്പോള് ടൂറിസ്റ്റ് ബസുകളെയാണ് ആശ്രയിക്കുന്നത്. എന്നാല് ഈ ഡ്രൈവര്മാരുടെ ഡ്രൈവിങ് പശ്ചാത്തലം, എക്സ്പീരിയന്സ് തുടങ്ങിയവ ആരും ശ്രദ്ധിക്കാറില്ല. വിനോദയാത്ര പോകുന്ന ബസിന്റെ വിവരങ്ങള് ആര്ടിഒ ഓഫീസില് കൈമാറാന് ശ്രദ്ധിക്കണമെന്നും മന്ത്രി പറഞ്ഞു.